1 Thessalonians 2
Paulo Ena Mivikala no Anu Xaixai Noxou ne Tesalonika
1Ioxe, ta vivixe. Ngingi menge ngelavusou xaixai ane nexi te'oxonu no voxo ane nexi texolu noxinge ne, anu munene'a. 2 aXe ngingi ngelavusou kalumo lexe no voxo ane nexi tane'e noxinge uao, la nexi texolu ne Pilipai la nexi teno'u navunavu mo mipamaelanexi. Ia no voxo ane nexi tene'e texali noxinge, la Lataua noxinge musu'uilinexi sou lexe nexi tetulu pekia'ixe noxi'a ta uluamexi mo tea'aloxu vaikala noxou mulai noxinge. 3Xo no voxo ane nexi telingainge sou lexe ngamuxaxu tangengi noxou Iesu, la vaivaikalamexi ne upolo va'axu no anu vaikala manina noxou Lataua mo uxali vitanisi sou xavutala masumasua xe takalavoingengi uasi. 4 bNexi vaikalamexi ne sou u'oxone'i ta mitema i'osa uasi, ia anu sou u'oxonu Lataua u'osa, xo Anu mulavusou oponexi. Nexi tavikala aloxo ne, xo Lataua mulosixe xaixai sou lexe nexi taa'aloxu a'alo laixe noxou Iesu. 5Mo ngingi ngelavusou lexe nexi ta'oxonu vaivaikala se'i sou taxolixolingengi mo tavikalangengi sou ta'umenu mii ma'ia ane noxinge ne uasi. Lataua kalumo Anu mulavusixe aloxo ne. 6Mo nexi taxaxai sou tano'u uala tila noxi'a ta mitema xe noxinge uasi. 7Nexi ta mitema sou xaixai noxou Kalisito, la nexi umomomosou tavikalangengi sou nasu'ulinexi. Ia nexi texolu no taiingengi, la nexi texolu se'isisi loxo ta molomolo ta neni'a isaxila'a sou ilosi'a susu. 8Nexi temasaxainge misevile, la sou nexi te'osa sou talosinge a'alo laixe noxou Lataua. Ia a'alo laixe noxou Lataua nesi uasi, talosinge maulinexe kalumo. Xo ngingi ngexali loxo nexi tanexingenge manina. 9 cMo ngingi ta vivixe, ngelavu manina no anu xaixai toxoxa'a e nexi te'oxonu mo tu'utu'umaxu e muxali noxixe no voxo ane nenge'a texolu. Mo ngingi ngelavu lexe nexi tea'aloxu a'alo laixe noxou Lataua mulai noxinge, la nexi texaxai no aso xe no 'olovoxo sou talosinge tu'utu'umaxu noxou evile uasi.10Mo ngingi ngongi'a Lataua ngemaisou lexe nexi texolu no taiingengi ane ngemuxaxu tangengi noxou Iesu, la texolu va'axu no anu 'ili'ilixo masumasua loxo Lataua mumasaxau, mo temulinu 'ili'ilixo mu'isalili xe ta'oxonu susu vile no iengi sou ngavikala masua une'e noxixe uasi. 11 dXe ngingi ngelavu lexe nexi te'oxonu 'ili'ilixo mulai noxinge aloxo ta molomolo ta mami'a i'oxonu ulai noxi'a ta 'ili'a. 12Ia nexi telosinge vaivaikala sou teavutilixu xavutalamengi mo tepeletotosinge xe texolixolingengi sou lexe ngingi ngaxolu la maulingenge ne umomomo no anu masaxa noxou Lataua e mu'avalinge sou nga'unalai no anu saxisaxila'u noxou mo ngano'u mimii lailaixe ane Anu ulosinge.
13 eLa nexi talemo laixe musuku ulai noxou Lataua no voxovoxo utotomu. Xo no mine ngingi ngelomusou vaikala noxou Lataua e nexi tea'aloxu noxinge, la ngingi ngeno'u vaikala ane ne loxo vaikala noxou itema vile uasi, ia ngeno'u loxo anu vaikala noxou Lataua ane anu uxaxai noxinge ngingi ta mitema ane ngemuxamuxaxu tangengi noxou Iesu. 14 fTa vivixe, ngingi ngexali loxo ta mitema noxou Lataua ne Iutaia. Ane'i ta mitema ane ne, ilo'a Kalisito Iesu mipita vilesisi. Ngingi ngeno'u navunavu ne no avo'a ta mitema sou tualasinge, la anu aloxo ta mitema noxou Lataua ne Iutaia ne mino'u navunavu no avo'a ta Iutaia. 15 gAne'i ta Iutaiasi ane mivau Tila Iesu musoli mo mive'ave'a ta mitema sou palomatana kalumo, xe mikusaixe. Ane'i mi'oxonu 'ili'ilixo aloxo ne, la sou Lataua u'osasi'a uasi mo ane'i mixali loxo ta uluai'a ta mitema tavu'alo mukalusi. 16Ane'i italutaluxu vote'i sou lexe nexi tamomomo sou taa'aloxu a'alo laixe ulai noxi'a ta mitema ta tematana ane'i mata noxi'a ta Iutaia uasi xo ane'i imasaxa lexe Lataua upamauline'i ta mitema ane ne uasi. Anu aloxo ne, la sou ane'i i'oxo'oxonu 'ili'ilixo masumasua mu'oki'oki tani misevile. La sou opo la'ia noxou Lataua a mune'e muxolu noxi'a mukalu ne.
Paulo Ena Mimasaxa Misevile sou Lexe Imaisi'a ta Tesalonika La
17Ioxe, ta vivixe. Nenge nenge'a tekalipala mo texolu va'axu mo tamaisou ienge maxuveeni malaxu uasi, ia tanexi a uxoxolu noxinge ne sio. Anu aloxo ne, la nexi masaxa noxixe mutila musuku sou lexe tamaisinge la, la sou tepulili lexe tane'e noxinge. 18Nexi tetovonu sou lexe tane'e noxinge. Eni Paulosi, la etovo lexe alai ka alai la, ia Satani utalutalunexe. 19 hTava'u xo nexi temasaxa lexe tamaisinge la, xo no iou Tila Iesu no mine Anu lailivuxu sou ulivu une'e la, la mii ma'ia ane u'oxonexi sou taloopala mo ta'osa xe tano'u kisivalu ane usosovosou lexe nexi te'oxonu xaixai laixe? No anu xaixai noxingesi ane. 20Ani, manina musuku. Nexi ta'osasinge mo ta'itinu ualasinge.
Copyright information for
ATA